Melodie: Michael Jackson; Thriller

Es het ke Reh meh,

Will hundert Jeger trample dur e Wald.

Die sueche üs, heh!

Doch mir si schlau. Mir schliiche ab, wenns knallt.

Die hei e Mord-Luscht,

Wie dr Putin, wo d Ukraine frässe will.

Die hei e Mords-Fruscht:

Im Wallis sueche si, doch mir si do, April! - April!

Jeger si Killer! Kille gärn! Si säge s gäb zvil Wölf, drum wärde mir dezimiert.

Mir si im Killer-Thriller do.  Mönsche gits vil zvil!  Nid Wölf!  Dr Mönsch ghört reguliert!

Jetz hei mir Hunger!

Zum Glück isch hüt s Rotchäppli zue n is cho.

Jetz nimmts üs Wunger:

Äs het üs gseit, s heig vil Grossmüeter do.

Grossmüeter munde!  

Vil besser, als so blödi Schöf mit Fäll!

Mir hei Euch gfunde

Dir schmöcket eso lecker!  Passet uf!  Mir biisse schnäll!

Dir sit im Killer-Thriller do!  Die Jeger si für d Füchs: Die si jo noni mol z Bärn

Dir sit im Killer-Thriller do!  Üsi Schnauze safte! Mir hei Euch  -  zum Frässe gärn !!

Ouuuuuuuh

Melodie:  Hildegard Knef; Für mich soll’s rote Rosen regnen

Prolog:

Könnet Dir dr Unterschied zwüsche Ankli, Kolly, Hodel, Wyss und ere Gruppe Schwarzfahrer im Zug?

Keine! - Si si alli froh wenn ke Schaffner chunnt!

Vor paar Johr ha n i gseit: I will - ganz vil

Wott gross si, regiere, kommandiere, reussiere

Vor paar Johr ha n i gseit: I wott

Bi Gott, s Rothus – oder nüt

Für mi söll s roti Rose rägne!

Wott nur kompetänte Kollege begägne

Wei zäme d Regierig rot umgestalte,

Wei schalte und walte, und üs entfalte.

Und hüt do säg I konschterniert, pikiert,

Die wo mi bim regiere geniere, muesch führe!

Jo hüt säg I dezidiert, ungeniert:

Wär nid folget, ghört abserviert.

Für mi söll s roti Rose rägne!

Und wenn i nur ständig so Zwärgli begägne,

Wo Schiss und au chronisch nüt z säge hei,

Denn isch s glaub am beschte – i regiere elei!

Melodie: Polo Hofer’s Schmetterding; Wenn mys letschte Schtündli schlaht

Uf Kamerade!  Mir hei e länge Schnuuf!

Solang das s Wasser het  ir Aare  tüe mir warte druf!

Nid nur e Ewigkeit!  Nei: Bis mir es fähigs Bauamt hei!

Bis s Gäld rägnet und s Kurhuus räntiert,  ufem Wissestei.

Wenn dis Kamel dur s Nadelöhr spaziert,

Wenn d Hasematt  i d Nordsee isch erodiert,

Wenn nach em jüngschte Tag  em Liebgott si Bart ergraut:

Denn wird dä Aarestäg villicht baut!

Melodie: Die Prinzen; Küssen verboten

O liebe Elter und liebi Elterin: 

Mir si vo r Kanti und hei nur s Beschte im Sinn. 

Will jedi Lehrchraft und jedi Lehrchräftin 

Vermittle gschlächter-gerächte Unterricht:In

Vom Mathematickende bis zur letschte Fänschterbänkler:In

Gilt inkludierend-nonbinäri Sprochdisziplin!

Und jetz das! Mir chöi s nid fasse! Nei, mir glaube mir spinne

Si die Mittelschuel-Beamtende de völlig vo Sinne?!

Gendern verboten!                     Gendern verboten!

                                Gendern verboten!                               Streng verboten!

Ke Kanti-Akademikende hätti das je glaubt: Gendere isch nümme erlaubt!

Gendern verboten!                     Gendern verboten!

                                Gendern verboten!                               Streng verboten!

Ke Kanti-Akademikende hätti das je glaubt: Gendere isch nümme erlaubt!

Und git d Lehrerin wäg däm e schlächti Note, denn isch gnue!

Säg ere «Jetz längt s. Dir sit e …

                                                        s Rind mit Milchfunktion !»

Melodie: Kinderlied; Itsy bitsy spider

«Cowboy und Indianer» spilt me nümm. Das isch passé.

«Batman gäge Superman» isch in und fägt vil meh.

«Räuber und Polizischt» isch out. Das fägt nid mol mit Hänker.

Stattdesse spilt me «UBS und CS: Krieg der Bänker».

Au «Dökterlet» wird nümme, nid mit Unggle, nid mit Tante.

Das Spili, das heisst jetze schint’s: «Pfarrer und Minischtrante»!

Melodie: Harry Belafonte; Banana Boat Song

Theo! I ha do …

Pass uf. Villicht seit me das nümm!

Theo! I ha do es Ding, fein für d Ching, inne wiss, usse bruun, so us Schoooggi?

«Mohrechopf», das seit me würklech nümm!

E dunkel Pigmäntierte us Afrika?

«Neger», das seit me würklech nümm!

E Ur-Iiwohner us Nord-Amerika?

«Indianer», das seit me würklech nümm!

E Bewohner us Grönland, wo im Iglu läbt?

«Eskimo», das seit me würklech nümm!

E Fahrende im Wald, wo öppe Chessel chläbt!

«Zigüner», das seit me würklech nümm!

Theo! Dä Typ do …

Mir gseh s. Und das isch würklech schlimm!

Theo! Dä Typ! Ke Kultur vo Natur us, wohnt stur ire völlig troschtlose Umgäääbig?

Nei, «Gränchner», das seit me würklech nümm!

Melodie: Robert Stolz; Was kann der Sigismund dafür, dass er so schön ist

Dr Alain het als Bundesrot d Schwiz vor Corona gschützt.

Das het dr Pharma gnützt - und zimlech Gäld verhützt.

Öb Fraue-, Flugzüg-, BLICK-Affäre – gar nüt macht ihn schlapp!

Das heisst, es isch verjährt: Jetz isch er ab!

Was cha dr Alain denn drfür, dass är so schlau isch?

Was cha dr Alain denn drfür, dass är gäng schlüüft?

Was söll do schlächt dra si, dass är e Rampesau isch?

Muesch chli beweglech si, und Schwein ha – und das ghüüft!

Was cha dr Alain denn drfür, dass är so schlau isch?

Was macht dr Alain für dass s Volk und d Press ihn schetzt?

Und dass är gäng ab cha, bevor dr Super-GAU isch?

Raffiniert muesch si und immer guet vernetzt!

Melodie: Gospel; This Little Light Of Mine

Auszug aus dem Lösch- und Vogelschutzreglement vom Kurhus:

·       Am Donnschtig, wenn s rägnet, bi Vollmond isch Lösche ab 22:30. Falls dr Blaufilter zum Isatz chunnt, ab 23:15.

·       Im Auguscht, im Obsigend, wenn d Venus im achte Hus stoht bi Südweschtwind, isch komplett Lösche ab 21:45

·       Im Septämber mit Bise, wenn dr Güggel vor de Hüener is Bett goht, isch lösche bi Halbmond ab 22:43 . . .

 ***

D Liechtli vom Wyssestei – tüet se nid lösche, Nei!

D Liechtli vom Wyssestei – mir si froh, dass mir se hei

Mit Liechtli vom Wyssestei – füehle mir üs dehei.

Nid Lösche, Nei!  Nid Lösche, Nei! Nid Lösche, Nei!

E Vogu flügt ganz elei – übere Wyssestei,

froh, dass mir Liecht do hei – süsch fändi är nümm hei.

Wenn mir ke Liecht do hei – bliibt dä no lang elei!

Nid Lösche, Nei!  Nid Lösche, Nei! Nid Lösche, Nei!

Vögu chöme ohni Bei – übere Wyssestei.

Dasch will si Flügel hei.  Nid eine nur, nei, zwöi.

Wenn die nid flüge chöi – wills schwarz isch ufem Wyssestei: 

Müedi Bei!  Müedi Bei! Nid Lösche, Nei!

Ei Vogu leit es Ei. Zwe Vögu legge zwöi!

Si wüsse nid, ischs eis, ischs zwöi – will si znacht so dunkel hei!

Hälfe tuet do elei – es Liecht ufem Wyssestei!

Nid Lösche, Nei!  Nid Lösche, Nei! Nid Lösche, Nei!

Nid Lösche, Nei!  Nid Lösche, Nei! Nid Lösche, Nei!

Zwe Vögu die si gay – will si kes Wiibli hei

Dr eint seit em ander: hey! – So git das nie kes Ei

Mir finde keis Wiibli, nei – ohni Liecht ufem Wyssestei!

Nid Lösche, Nei!  Nid Lösche, Nei! Nid Lösche, Nei!

Nid Lösche, Nei!  Nid Lösche, Nei! Nid Lösche, Nei!

Melodie: Robert Stolz; Im weissen Rössl

Wenn am Donnschtig Zobe wettsch go poschte do,

De merksch: S’isch keine do. S herrscht töifschti Rueh!

Nach de Achte no n es Bierli übercho,

Chasch grad vergässe do! S git nüt! S isch zue!

Chunnsch zum Bieltor ii, de packt di s Gruuse do.

Will alli pfuuse scho!  D Stadt isch wie tot.

Doch ändlech – Halleluja! – isch d Erlösig cho!

I weiss es Plätzli do, wo alles stoht(!) :

Es chunnt es Hüsli a d Löiegass,

Dört wirdsch Du immer bedient!

Me tuet Di luschtvoll umsorge

Und kei Mönsch seit «Sorry aber jetz isch d Kaffimaschine scho putzt»

Und au wenn Du bis am Morge blibsch,

Hesch durchgehend Luscht und hesch Spass!

Und kei Mönsch rüeft «chasch mer bloose»!

    Usser du wotsch’s wie d Franzose

        Mit Strümpf oder mit Läderhose

            In griechisch und römischer Pose

                Für Handwärker, Lehrer, Matrose

                    Zahlt’s d Kasse au gäge Arthrose

                        Lokal und in Ganzkörperdose

                            Mit Latex und mit Cellulose

                                Mit Nidle us Kisag-Spraydose

Und nie meh dänksch «toti Hose!»      

Ir Altstadt ar Löiegass!

Melodie: Kinderlied; Itsy bitsy spider

D Mumie vom Cheops steckt im goldig Sarkophag

Dä steckt ir Pyramide. Bis ne findsch suechsch mänge Tag

D Königin vom Grossmogul, die steckt im Tadsch Mahal.

Die goldig Greberchammere suechsch im ne riese Saal.

So Dänkmol gits au z Soledurn. Muesch gar nid lang go sueche:

Üsi Königin In-Gold, versteckt im Sutter-Königschueche. 

Melodie: Mani Matter; Dr Alpeflug

Wär Sunnekollektore wott montiere, bruucht Geduld

Bis das Züg chunnt, wartisch ewig, d Lieferchetti sigi tschuld.

Au uf Hueschtesirup wartisch, schnäll paar Monet bis er chunnt,

dr Suezkanal isch gschlosse, wenn er chunt, bisch lengschtens gsund.

Schruube, Halstablette, Möbel, Transischtore, Paprika,

hei vil lenger, denn si müesse rund ums Horn vo Afrika,

Denn uf Chlibüs dure Kongo mit Machete uf Asmara,

Dört verlade uf Kamel, e Karawane dur d Sahara.

Mit em Schluuchboot uf Granada, rund um Island uf Paris

Denn dr Rhi zdüruuf und mit em Bipperlisi do zu üs.

Wo die Gschicht äch ändet, frogsch di, doch gigantisch isch dr Fruscht,

Denn au d Pointe für dä Värs chunnt allerfrüechstens im Auguscht.

(Melodie: Bee Gees; Stayin’ alive)

Wär lang do schafft, goht druuf. Egal!  Schliesslech schafft do keine lang.

D Frog isch: Flüchtisch sälber, oder packt dr Chef di und seit: «Gang!»

Chefin furt.  Chefarzt furt.  Wär schloft und schwigt? Dr Fluri Kurt.

D Schaffner meint, s gieng si nüt a.  Wenn lüpft s ächt dr Hüüserma?

Dr Füehrigsstil isch kolonial. Im Bürgerspital. Im Bürgerspital!

Dr Tschutt dä git me dir anal. Im Bürgerspital. Dasch dört normal.

Hah! Hah! Hah! Hah!  Bürgerspital! Bürgerspital!

Hah! Hah! Hah! Hah!  Bürgerspitaaaah  Aaah  aaah  aaah  aaal!

Bettehüüser brucht s nid zwöi. Schad, dass si s falsche abgrisse hei!

Macht di nid dr Job zur Sau, so schafft das sicher d «Kunscht am Bau»!

Schwöschter furt. Pfleger furt. Wär schloft und schwigt? Dr Fluri Kurt.

Au d Putzfrau isch nümm füre cho.  Gli schaffe nume mir no do!  

S Arbetsklima isch brachial: Im Bürgerspital. Im Bürgerspital!

Morn git s scho dr nöchscht Skandal. Im Bürgerspital. Dasch dört normal.

So! Ha! Hah! Hah!  Bürgerspital! Bürgerspital!

So! Ha! Hah! Hah!  Bürgerspitaaaah  Aaah  aaah  aaah  aaal!

Würgerspital!

(Melodie: Ronald Binge, Elisabethserenade)

Komplimänt Elisabeth! … (Glockenspiel)

Machsch Karriere im Schlof.  D Frau Herzog findt’s doof,

Doch s liebt jede Goof  s sympathische Schof!

Elisabeth.

Du hesch s gschafft, Elisabeth!  Wär hätt s dänkt Elisabeth!

Jetz bringsch Du Harmonie  is Bundesrots-Vieh,

Souplesse und Benäh.  Me seit nur no: «Määäääh!»

Elisabeth.

Chumm Alain, säg «Määäääh!»  

(Melodie: Ennio Morricone; Spiel mir das Lied vom Tod)

Stilli -

Liislig süüslet dr Wind zum Bieltor ii -

E chlini wiissi Tuube pickt es Brösmeli ab de lääre Tische vo dr Suteria -

Es Haselmüüsli däselet über d Büecheruslag vorem Lüthy -

Es einsams Pudeli streunt vor em Manor düre und brunzt a ne Ghüderchübel -

Im Hofer gammle drü Nidlechüechli fridlech vor sich häre -

Voller Rueh ruusche d Spitzahörn uf em Fridhofplatz –

-

S isch Obeverchauf !

 (Melodie: Kinderlied; Itsy bitsy spider)

Ir Weststadt stoht es Zält, dört wird dr Stadtmischt drin behandlet.

Dank däm wird s Landschaftsbild trotz Mischt und Ghüder nid verschandlet.

Das Zält isch guet, doch leider z chli. Eso isch das für d Chatz:

Chli weschtwärts und chli breiter – de hätt Gränche drunder Platz!! 

(Melodie: Kinderlied; Itsy bitsy spider)

Dr Charles schloof mit sim Teddybär, d Camilla oben ohne,

Är schlegli mit sim Brüetsch und meh so gheimi Sensatione,

Mit däm verdient dr Harry hundertfüfzig Millione.

Dir gseht: So Gheimnis z biichte, cha sich gopfridschtutz scho lohne!

D Wohret brichte wär doch lukrativ und gar nid schwär!

So wär dr Alain Berset gli mol Milliardär.

(Melodie: Chris Roberts; Mein Name ist Hase)

I üsem Spital het d Frau Chef müesse go.

Das heisst, me weiss nid, isch si eigentlech no do.

Mir wüsste so gärn, öb me si het entloh.

Doch Wurscht was passiert: S wird nüt informiert!

Will s Departemänt heig ke Ahnig dervo:

Mein Name ist Susanne und ich weiss von nichts.

Isch öppis passiert?  I bi nid informiert!

Bi die falschi Adrässe!  Ha alles vergässe!

Mein Name ist Hase.  So wird do regiert!

Dr BLICK isch am schnällschte, är druckt Covid-News.

Was d Bundesröt bschliesse, gäng zwee Tag vorus.

Är hilft drum em Berset, die Schwizer z erzieh.

Das darf dä doch nie!!  -  Jetz isch s halt eso.

Doch dr Alain het ganz sicher nüt gwüsst dervo!

Mein Name ist Berset und isch weiss von nischts.

‘at jemand geplaudert?  Mon Dieu, non!  Misch schaudert!

Der Lauener ist Schuld!  Jetzt ‘aben Sie Geduld!

Mein Name ist ‘ase und Schweigen ist Gould!

S FBI het hochgheimi Akte entdeckt.

Und stellet nech vor: Wo hei die nume gsteckt?

Nid im Wiisse Hus.    Nei, im Chef sir Garasch!

Das isch e Blamasch! Wär het die dört gloh?

I wette dr Biden weiss gar nüt dervo!

Mein Name ist ….  Äh… (“Biden!”)…. oh yes, that’s my name!  

Frog nid wo n i wohne!  I glaube, deheim.

Ha d Socke im Chüelschrank, und s Pijama im Klo,

I ha gar kei Garasch. Weiss ömu nümm wo!

(Melodie: VolXRoX; Go Odi go !)

Immer hert am Limit wenn me diskutiert.

Immer ideologisch ufmunitioniert.

Dini arme Gspänli si jo gäng fruschtriert,

Will, wär nid pariert wird vo dir filettiert.

Stohsch im Rothus parat. D Zwärgli näb Dir im Griff.

Du bisch Kapitän und dr Kanton Dis Schiff !

Go go go go, Susi go!  Susi, Susi go!

Geisse-stuur fahrsch allne über s Muu.

Go, go, go, Susi go!  Susi, Susi go!

Du seisch wo düre!  Rächt hesch nume Du!

Jedi Kritik und jedi Logik gö a Dir verbii.

Ke Widerspruch! Wo chiem me do au hii!

Go go go go, Susi go!  Susi, Susi go!

Geisse-stuur fahrsch allne über s Muu.

Go, go, go, Susi go!  Susi, Susi go!

Du seisch wo düre!  Rächt hesch nume Du!

Susi, Susi, Susi: Go!!

(Melodie: Mani Matter; Dr Sidi Abdel Assar vo El Hama)

Dr Sidi Abdel Assar vo El Hama |

"Hee, spinnsch? Aber nid im Ärnscht jetz!  Dä Song isch doch rassistisch!"

Wieso?  I ha doch gar nüt gäge Araber?

"Aber ‘Sidi Abdel Assar vo El Hama’! Das isch kulturelli Aeignig. Das goht überhaupt nid. Do isch mir also extrem unwohl! Sing öppis us dr Schwiz!"

Dr Sigi Schmid vo Obergerlafinge |
 
"OK"

Het mol am Morge früeh, no im Pijama | Jo weisch! … Dasch doch blöd, jetz riimts jo nümm.  Isch das würklech nötig, mit dire Kultur-Entwändig?

"Das muess so si hüt! Süsch isch üs allne unwohl! Usserdäm isch Pijama sowieso gränzwärtig! Fasch chli schlüpfrig. Pornografisch, so nes Pijama!"

Het mol am Obe, churz vor em go singe | 
Ir Stross vor dr Moschee |

 "Halt, stopp!  Wottsch jetz würklech d Islamischte reize?! E Moschee!  Nei so öppis, e Moschee!"

Momänt! Isch jo guet, wart:
Ufem Wägli näb em See | 
Zwöi schöni Auge gseh |

"Stopp! «Auge»: So öppis unsensibel Antifeministischs! Du chasch doch e Frau nid uf ihri Auge reduziere! Das isch jo reins Macho-Gehabe, was söll de das? Nöchschtens verlangsch no es Burkagebot, für dass me besser uf d Auge cha luege, oder was?!"

Also: De halt: Zwöi schöni Wadli gseh | 
Und het dänkt, mit dere go böötle würdi s bringe. | 
S isch d Tochter gsi vom … |

"Haalt! I weiss genau, was jetz chunnt! Vergiss es! «D Tochter vom Mohammed Mustafa»: Ufruef zu Frauehandel! Beschönigung vo Zwangshürot und Prostitution!!  Herrgott nomol: Chasch de nid bi Schwizer Theme bliibe? Ohni Sexismus und kulturelli Aeignig bitte!"

Si wei es Böötli miete – sie heisst Klara.
Är träumt, wie si im Boot is Glück tüe fahra.
Doch s Boot das choschtet zvil.
Drum geit sie jetz mit em Till | 
Und är dänkt, hätt i doch früecher afo spara! |

 "Ändlech öppis kulturell authentisch Schwizerischs!  Spare: Soguet! Bravo!  Goht doch!"

(Melodie: Kinderlied; Itsy bitsy spider)

Corona schreckt üs nümm – Impfdose gammle vor sich hi.

Jetz lauft scho d Vorbereitig uf die nöchschti Pandemie.

Weles Virus kippt üs äch de nöchscht Johr us de Socke?

Isch s äch Influenza oder ehnder Affepocke?

D WHO wott konsequänt Asteckige verhüete

Und tuet drum schints jetz Influencer präventiv verbiete.

(Melodie: Edith Piaf; La vie en rose)

Nei, chöit dänke liebi Lüt

I weiss ganz sicher nüt.

Nid mol under Hypnose!

Wenn mi Pressechef zvil schnurrt,

Wird är entsorgt, Schwupp! Furt!

Wie abgloffni Impfdose.

S ganze Volk macht, was i wott.

I bruuch ke «Blick», weiss Gott,

Das wär zum Quatsch no d Soosse!

Me liebt mi, verehrt mi, me het mi so gärn.

I bi au Di Stärn! Und wenn nid, chasch mer bloose!

La lalalalalala. La lala c’est ça, la vie en rose!!  

(Melodie: Mani Matter; Alpeflug)
Ufem Bauamt chlöpfe d Korke, S Zwöiezwänzgi het rentiert.

Denn dr Poschtplatz isch jetz suber. Alli Böim si abrasiert.

Amthuusplatz, Dornacherplatz,  -  Jetze luege mir’s als klar a 

Wohi s Bauamt mit dr Stadt wott:  Ihres Leitbild isch d Sahara.

Melodie: Michael Jackson; Earth Song

D Gletscher tüe schmelze! - S Klima isch z warm!

Mir schwitze und schwitze! Drum schlöh mir jetz Alarm.

D Fisch si verdunschtet! S Plankton verpufft!

Mir hei nüt me z frässe! Nur no warmi Luft!

Mir Pinguine flüchte, ohni Pass und ohni Gäld.

Zu Euch. Dir müesst üs hälfe! Süsch goht si under, d Wält!

A AAA A AAA AHH !! U UUU U UUU UHH !!
A AAA A AAA AHH !! U UUU U und tschuld bisch DU !!

Doch bi Euch ischs nid besser! Überall warmi Luft!

Lueg nur mol im Gmeindrot, wie si dört läär verpufft.

S Wasser wird giftig! D Böim bringt me um!

S het nur no EIS Mammut – das im Stadtpräsidium.

Und jetz verschwindet s letschte Walross, und keine proteschtiert:

He jo, Dir heits doch ghört: Jetz wird dr Wöfu pensioniert!

U UUU U UUU UHH !!

Melodie: Michael Jackson; Earth Song

Melodie: Karel Gott; Einmal um die ganze Welt

Suechsch es Tassli für e Tee,

Findsch Duschvorhäng und Negligée, villicht au Zahnpasta!

Uf dr Suechi nach re Vase

Landisch bi de Oschterhase und de Pijama.

Wenn frogsch: „Wo find i d Chrömlidrucke?“ ärntisch nur es Schulterzucke.

Dasch doch genial !

Will Gäld usgäh chasch würklech keis. Gliich machsch e grossi Reis

I däm Lokal:

Du suechsch die ganzi Hütte ab, und Du findsch nüt, und Du machsch schlapp.

Chönntsch zwüsche Lego, Slips und Bettzüg glatt verroschte!

Vom Chäller bis im dritte Stock hilft niemer. Will si hei kei Bock!

So geit s, wenn Du im umbaut MANOR gohsch go poschte!!

Melodie: Karel Gott; Einmal um die ganze Welt

Melodie: Natacha; Sölli, sölli nid

Letschthi wo-n-i am Perron bi gstande

Het d Frau dört im Lutsprächer gseit,

Es sigi grad kei Loki vorhande.

Und dass mi Zug drum nid fahrt, sondern steit.

Zwe Stund spöter, wo si de no ne Loki hei gfunde

Do steit er no gäng, doch er chönn nüt drfür:

Jetz heigs drum ke Lokfüehrer me, e ke gsunde,

Und dr Kondukteur chlömm no ir Tür.

Fahrt er? Fahrt er nid?

S stoht i de Stärne, öb dä hüt no fahrt.

Villicht hei si jo s Fahrpersonal igspart.

Villicht stoht uf de Schine es Kamel mit Scheich.

Villicht isch wäg em Wätter e Weiche z weich.

Fahrt er? Fahrt er nid?

Lit dr Verchers-Leiter z lang bir Frau im Bett,

Will är hüt e Schwellwärch-Störig het?

Het me ächt e Fahrleitig abmontiert?

Oder ghöre d Cheffe mol usrangiert?! ...

Morn nimm i s Auto!

Melodie: Natacha; Sölli, sölli nid

Dä Butti tschitsch wo jetz als Trump–Nachfolger kandidiert

Dä het ke Chance bi dene Wahle. Dä wird abserviert!

Dä Typ isch diplomatisch, redt föif Sproche, het studiert!

Für dä Job isch dä hoffnigslos überqualifiziert!

Melodie: Kinderlied; Itsy Bitsy Spider

Melodie: Albert Hammond; I'm a Train

Lueg do! He! S chunnt e Zug! Uf dr Stross chunnt e Zug!

S isch e Zug, s isch e schigge Zug, Yeah!

Dä fahrt Dir i dim Auto diräkt vor e Bug!

S isch e Zug, s isch e schigge Zug, Yeah!

So ne Scheiss! Do het s Gleis uf dr Stross! Nid nur eis!

Für dä Zug, für dä schiggi Zug, Yeah!

Fahr ewägg! Mach e Satz! S chunnt e Zug! S het ke Platz me!

Für Di und dä schiggi Zug, Yeah!

Flüchtet! S Lisi chunnt – BUMM! – Flüchtet! S Lisi chunnt – BUMM! –

Scho z spot! S Lisi bummst! - S isch e Zug, s isch e schigge Zug, s isch e schigge Zug,

s isch e Zug, s isch e schigge Zug, schigge Zuuuuug, Yeah!

Doch im ganze Riedholz isch me stolz uf dä Zug!

Uf dä Zug, uf dä schiggi Zug, Yeah!

Gli chasch all Viertelstund mit em Hund uf Paris

Mit däm Zug mit däm schigge Zug, Yeah!

D Garage hei Hochkonjunktur will s gäng chlöpft

uf der Spur vo däm schigge Zug, Yeah!

Und wenns Dir öppis git isch dr Friedhof nid wit!

Mit däm Zug, mit däm schigge Zug, Yeah!

Bättet! S Lisi chunnt – BUMM! – Bättet! S Lisi chunnt – BUMM! –

Bättet! S Lisi bummst! - S isch e Zug, s isch e schigge Zug, s isch e schigge Zug,

S isch e Zug, s isch e schigge Zug, s isch e schigge Zug,

S isch e Zug, s isch e schigge Zug, s isch e schigge Zug,

S isch e Zug, s isch e schigge Zuuuuuuuug! BUMM!

Melodie: Albert Hammond; I'm a Train

Melodie: Erste Allgemeine Verunsicherung; Ba-Ba-Banküberfall

I ha deheim e chli Gäld. Verdient, nid gstole!

Ha Angscht, das chönnt mol e Räuber cho hole.

Aber s Gäld schafft nid im Chleiderschrank.

Drum chratz i s zäme und bringe s uf d Bank.

I warte bis off isch und bringe s a Schalter.

Dört sitzt e bewaffnete Bankverwalter,

Kassiert mini Stütz mit vil Gegrins,

Zieht d Pistole: “Häre mit em Negativzins!!”

Dasch e Ba Ba Banküberfall, e Ba Ba Banküberfall!

Es tuet üs leid, das muess so si: Üsi Rändite isch süsch vil z chli!

Mis Gäld isch wägg. Zahle cha n i nit.

Das heisst; I bruche ne Bankkredit.

Dä am Schalter seit: “Gärn!” und foht a strahle,

“Mir chöi nech drfür sogar Zinse zahle!”

I bi baff. Cha das si?! I froge ne nume:

“Überchum i de jetz Gäld für dass i Gäld überchume?!”

Är meint: “Jo, dasch scho nid optimal:

Für üs wärs günschtiger, dir miechet e Banküberfall!

Ba Ba Banküberfall, E Ba Ba Banküberfall

Mach e Ba Ba Banküberfall! Dr Wahnsinn isch immer und überall!

Melodie: Erste Allgemeine Verunsicherung; Ba-Ba-Banküberfall

Chrank - Müed; Läär! - Uuspumpt!

D Scheiche si weich. Dr Mage chnurrt. S Portmonee isch läär. Uusgnoh!

So würkt s Corona – Virus

I sir Soledurner Form.

Si Würkig isch enorm.

Wenn d Rächnig gsehsch, gschpürsch lang no s Gruuse:

So chunnsch Du nach em Ässe us dr Chorooone use!

Melodie: Ennio Morricone; Spiel mir das Lied vom Tod

Melodie: Elvis Presley; Return to sender

I ha nur welle rasch go schiffe

Paar Fraue hei bim WC demonschtriert.

I ha zersch dänkt, die wei dört inne kiffe,

Doch die hei s Pissoir abmontiert!

Dr Huswart seit mer:

“Dasch wäg däm ‘Gender’! – Jetz isch s passiert:

Will jedes Pissoir d Frau diskriminiert!”

S Ruth und s Evi wette zäme Chinder.

D Natur het se bis jetz diskriminiert.

Si froge sich: Wie macht me s bi de Rinder?

Und so het s funktioniert.

Si rüefe fröhlech:

“Es Hoch em Spänder, wo produziert!

Soomebank merci! Die Bank räntiert!”

Dr Peter heisst jetz Petra und isch Transi.

Me het ne drum vor 3 Tag operiert.

Dasch Päch, will geschter isch si Ma, dr Hansi

Zur Lesbe konvertiert.

Är seit zum Dokter:

“Return mi Ständer! - Return mi Ständer! - Return mi Ständer! ....”

Melodie: Bobby McFerrin; Don't worry be happy

U u u u uuh uuuuuu, U uuuuuu, U uuuu !

U u u u uuh uuuuuu, U uuuuuu, U uuuu !

Zimli giftig isch Nitrat

Mit gnue Nitrat machsch dr Spagat!

--- Don’t worry! Be happy!

No besser würkt Ammonium:

Mit däm bringsch jedes Omi um!

--- Don’t worry! Be happy!

U u u u uuh uuuuuu, Don’t worry! U uuuuuu, Be happy! U uuuu ! Don’t worry, be happy!

Vo Zuchu bis uf Recherswil

Näh mir jetz Chlorothalonil

--- Don’t worry! Be happy!

Gschpürsch es Würge i de Gen

Isch s wäg em Perchlorethylen.

--- Don’t worry! Be happy!

Scho weni Atrazin cha s bringe:

Durchfall quer dur Gerlafinge!

--- Don’t worry! Be happy!

Kei Angscht! Am Schluss isch d Dosis wichtig:

Nur wenn gnue suuffsch de nimmt s di richtig!

--- Don’t worry! - S isch gsund s Hahnewasser! S isch gsund!!

Melodie: Volkslied; Humba Humba Hassa

Banke-Ufstand herrscht in Züri:

Bänker trampe nang uf d Schwänz.

Si löh nang heimlech lo beschatte,

Und haue ab zur Konkurränz.

Umba umbarassa Umba umbarassa,

Umba ee o ee o eee o ee o eee

Immer meh wird jetz au gschleglet

Dasch im Verhaltenskodex greglet:

Findsch im Büro wider Wanze

Gisch dim Nochber uf e Ranze

Umba umbarassa Umba umbarassa,

Umba Cree-dit Suisse o Credit Suisse Oje! Oje!

E schlächte Ruef chasch nümm verbocke

Au nid mit manischem Abzocke

Dr Ruef als Bank wird suber büglet

Wenn ei Chef dr ander prüglet.

Umba umbarassa Umba umbarassa,

Umba Cree-dit Suisse o Credit Suisse Oje! Oje!

Und muesch se abgäh, dini Chrone
Brchunnsch drfür 30 Millione.
Das goht uf, hei d Cheffe gfunde
S choscht üs nüt. Das zahle d Chunde.

Umba umbarassa Umba umbarassa,

Umba Cree-dit Suisse o Credit Suisse ade! – Ade!

“Doktor Silvan Freddi, Staatsarchiv: Von der Völkerwanderung bis zur Reformation.”

“Doktor Andreas Affolter, Staatsarchiv: Von der Reformation bis zur Revolution”

“Doktor Urban Fink: Bildung und Gesellschaft in der Solothurner Stadtgeschichte”

“Geprägter Stolz: Solothurner Münzen aus 7 Jahrhunderten”

“6. November: Einweihung der Alten Spitalapotheke im Alten Spital”

“Solothurner Steinfreunde: 2000 Jahre Solothurner Stein – im Steinmuseum Solothurn!”

Das fägt wie ne More!! Das heizt richtig ii !!

Au dr Zitpunkt dä stimmt. Jetz muess das Fescht si!

Will: Hüür hei mer ne no – nöchscht Johr isch er furt!

Dr Letscht vo de Stadtgründer: Dr Konsul, dr Kurt!

Melodie: Ludwig van Beethoven; 3. Symphonie, 3. Sinfonie II. Marcia funebre [Adagio assai]