Fasnacht 2021 - Aktenzeichen Corona ungelöst

Inhalte von Youtube werden aufgrund deiner aktuellen Cookie-Einstellungen nicht angezeigt. Klicke auf “Zustimmen & anzeigen”, um zuzustimmen, dass die erforderlichen Daten an Youtube weitergeleitet werden, und den Inhalt anzusehen. Mehr dazu erfährst du in unserer Datenschutz. Du kannst deine Zustimmung jederzeit widerrufen. Gehe dazu einfach in deine eigenen Cookie-Einstellungen.

Zustimmen & anzeigen

Endlich ist es da - unser Video mit 7 brandneuen Bänken, für dich in der "Home-Fasnacht" zum Geniessen :-)

Falls du dir gleich einen bestimmten Bank anhören willst, hier findest du die 
Kapitel-Übersicht:

  • 00:00 #1 Intro
  • 03:09 Vorstellung - Who is who?
  • 04:24 #2 D 5-er Regle
  • 06:16 #3 S Impfzentrum
  • 07:43 #4 Schock down
  • 10:18 #5 Coronaopfer
  • 12:48 #6 Marsch
  • 14:51 #7 Gli wird s
  • 17:07 Abspann 

Unser Auftritt bei jumpTV :D

Inhalte von Youtube werden aufgrund deiner aktuellen Cookie-Einstellungen nicht angezeigt. Klicke auf “Zustimmen & anzeigen”, um zuzustimmen, dass die erforderlichen Daten an Youtube weitergeleitet werden, und den Inhalt anzusehen. Mehr dazu erfährst du in unserer Datenschutz. Du kannst deine Zustimmung jederzeit widerrufen. Gehe dazu einfach in deine eigenen Cookie-Einstellungen.

Zustimmen & anzeigen

Fasnacht 2021

Aktenzeichen Corona ungelöst

Leider gibt es in diesem Jahr keine Fasnachtszeitung, untenstehend findest du aber alle unserer Songtexte.

Intro

Melodie: "In Hell I'll be in good company" - The Dead South

Mir jage Terrorischte. 

Mir bringe se i d Chischte. 

Üs chasch nid überlischte. 

D Verbräche hüt si schlimm wie no nie!. 

 

Zum Bischpil dä im Coop – du meinsch, dä chauft e Salot. 

Doch är schliicht meuchlings ab zu de Hemmli!  Alarmstufe rot! 

Scho streckt är d Pfote is abgsperrte Gschtell – doch mir si uf Droot: 

„Hände hoch! Abfüehre!“ - Dank üs hei so Gängschter ke Brot! 

 

Und dä do rönnt us dr Bank mit Pischtole, Gäld-Sack, voll im Spurt! 

Chunnt a d Bus-Haltstell und schmeisst no rasch d Roger-Staub-Chappe furt. 

Mir griiffe zue. Handschälle und ab!  Dä Cheib chunnt jetz dra!  -  Will: 

Dasch e Bus-Haltstell!  -  Und dä het jo ke Schutzmaske a! 

 

Drum: 

 

Pass uf, wenn hueschte settisch! 

Pass uf, wenn schaffe wettisch! 

Pass uf, wenn z sächste glettisch! 

Mir hei nid wit.  Gli isch Ornig und Rueh! 

 

Wottsch würklech Fescht go feschte?! 

Wottsch würklech nid go teschte?! 

Di Nochber weiss s am beschte. 

Gli wüsse mir s au – und denn schlöh mer zue!! 

 

Berset: „Ja, es geht nicht ohne Opfer!“ 


Melodie: "In Hell I'll be in good company" - The Dead South

D 5-er Regle

Melodie: "S Zündhölzli" - Mani Matter

Mir hei es Fondue welle mache – hei dänkt, mir lade s Meiers ii 

Aber halt, die hei zwöi Chind! De wäre mir jo sächsi gsi. 

Doch d Frau Meier meint, s göng scho 

Die zwe Giele chönnte jo 

Zu ihrne Fründe go, dört sige si scho lang nümm gsi. 

 

Die einte Fründe si grad z füft, e Sächste wär jo eine zvil. 

Drum göh si grüppliwiis i Usgang, dasch jo eh was jede will. 

Wird e Gruppe wider z gross, 

Geisch als Sächste zrugg uf d Stross 

Und suechsch witer. Dasch doch glatt! Me seit däm Föifer-Chill! 

 

Die einte Gruppe gö uf Züri, andri zieht’s meh Richtig Bärn. 

Z Basel sig s schints bsunders luschtig. Bsunders lut isch s gäng z Luzärn. 

Schwizer, Türke, Serbe, Däne 

(Usser si hei Quarantäne) 

Luege dass si z föifte si. Das hei d Behörde gärn. 

 

Bravo, d Coronadisplin isch toll und s Gsetz isch reschpäktiert! 

S isch ar Zit, dass sich d Regierig mit me Orde dekoriert! 

Ir ganze Schwiz es Riese-Glöif, 

Doch überall si nume föif: - - - 

S isch doch toll wie das d Sozialkontakte reduziert! 


Melodie:  "S Zündhölzli" - Mani Matter 

S Impfzentrum

Melodie: klassisch Basel

Die Susann Schaffner isch scho knallhert bim Regiere. 

Si tuet das Impfzentrum für Gränche – zack! – blockiere. 

Für einisch müesse mir se do zwar unterstütze: 

Me impft jo würklech nume das, wo me wott schütze!

Bock down

Melodie: "Sex Bomb" - Tom Jones

“Brünett und elegant und ihres Härz isch gross!” 

“Vermögend, Strahlemann und die Figur – famos!” 

“Die Blondi do!  Für so nes Gsicht, do rönnt’ i wit!”  - 

Wie guet, dass es no “Tinder” git. 

 

Jetz hani de zwe Monet mit keim Typ me gredt. 

Abaggere, das goht nur no im Internet. 

“Jö die do! Wie kokett! I schriibe!  Meinsch die wett?” 

“Vergiss es! Mindestabstand au im Bett!” 

 

Lock down, Lock down, dä schiissig  Lock down! 

S het wit und breit ke Bar me off!  Wie find i jetz e Ma?! 

Lock down, Lock down – triffsch kei Frau im Lock down! 

Und wenn, het si no d Maske a! 

 

 

Jetz lueg mol die do: Wüescht, energisch, ahnigslos! 

Dä do mit em dicke Hals schribt Fairness gross. 

Die do mit em Rossbiss isch für s Schuelsystem. 

Und dä het sicher psychischi Problem! 

 

“Gradlinig”?! - Derbi isch nid mol d Nase grad! 

Hängebuse, Warze! Aber für ne starche Staat. 

Das Arschgsicht, nei!  I glaub i go is Zölibat!  --- 

Cool down, das si doch Wahlplakat! 

 

Bock down, Bock down!  Do isch mi Bock down! 

Das wirdsch jetz wuchelang a jedem Kandelaber ha! 

Bock down, Bock down! Das isch dr Bock down! 

Und die hei nid mol Maske a!! 

 

Jo leget dene Maske a!! 


Melodie: "Sex Bomb" - Tom Jones 

Coronaopfer

Melodie: "Eskimo" - Mani Matter

Könnet dir das Gschichtli scho 

Vo däm riiche Eskimo, 

Wo trotz Monete geschter so, 

Truurig isch ums Läbe cho? 

 

Är het z Grönland gseit: “I goh 

usem Altersheim drvoo.” 

Het i d Schwiz si Flüger gno 

Zum sich Förscht Klass impfe loh. 

 

Dr Dokter do seit “S isch eso: 

Corona isch es Risiko 

Dir müesst euch dringend impfe loh! 

Doch i cha das nid mache do”. 

 

Is Impfzentrum söll är goh! 

I d Rythalle. Är isch froh. 

Doch dört heists: “Was weit dir do? 

Zersch müesst dir e Termin `brcho!” 

 

Tifig het är s Handy gno 

“Bsetzt”!  Är isch i d Combox cho 

78 mol eso 

Aber är het nid lugg gloh. 

 

Bingo, jetz isch s Datum do 

Är isch zur Rythalle zrugg cho. 

Dört isch d Warteschlange scho 

Bis zum Kreisel füre cho. 

 

Und wo n är mit Maske do 

I die Schlange isch go stoh, 

Do isch s Bipperlisi cho 

Und het ne under d Reder gno! 

 

Und dir gseht d Moral dervo: 

S Lisi isch es Risiko! 

Corona wird emol vergoh 

Aber s Lisi blibt bestoh 

Gäg das chasch di nid impfe loh!! 


Melodie: "Eskimo" - Mani Matter 

Marsch

Melodie: Berner Marsch

Am zähni ghörsch dr Wecker goh, 

Langsam Zit, zum Näscht uszcho. 

Wär so fit I Morge startet, 

Wird belohnt, dr Chüelschrank wartet,
 

Zwüsche Yoghurt und Tomate, 

Hets au zwöi drüü Handgranate, 

Tuesch drmit nachem Rasiere 

Ufem Balkon chli jongliere
 

Wenn denn afo schaffe chönntsch 

Isch scho Zyt zum Mittagslunch 

Nach däm Stress settsch noni use 

Sondern zersch es Stündli pfuuse.
 

Mit früscher Chraft, als rächte Ma, 

Lohsch denn dr Computer aa. 

Dä befiehlt, söllsch retabliere 

Und im Reglemänt  Värs drü studiere.
 

Do lütet s Föifiglöggli scho, 

S isch Fürobe. D Zyt isch do. 

Dir gseht, si tuet ohni z Plagiere 

Geischt und Körper gliich trainiere 

Si hertet ab, stirb oder friss, 

D Rekruteschuel  im Homeoffice. 


Melodie: Berner Marsch

Gli wird s

Melodie: "The Wellerman" - Shanty

In China läbt e Flädermuus 

Dört schlüüft es chlises Virus drus 

Das chunnt zu üs – was fallt däm ii! 

Und jetz hei mir die Pandemie 

 

Refr.:   Zyt dass dr Berset chunnt! Berset gäll Du machsch üs gsund! 

             Du rettisch üs vom lecke Schiff!  Alain, du hesch’s im Griff! 

 

Me teschtet dört, me teschet do 

Die Tracing-APP nützt mordio! 

Ringring ring. Si lütet aa: 

“Hättsch geschter Quarantäne gha” 

 

Refr.:   Zyt dass dr Berset chunnt! - Ihm z lieb teschte mir üs wund! 

             Är rettet üs vom lecke Schiff!  Alain, du hesch’s im Griff! 

 

Au d Pharma-Branche chrampft wie gstört 

Die mache üse Impfstoff dört 

Dä schüzt üs, das isch doch patänt, 

Scho gli zu sächs Prozänt !                WOAU! 

 

Refr.:   Zyt dass dr Berset chunnt! - So lauft d Pharmabranche rund! 

             Är rettet üs vom lecke Schiff!  Alain, du hesch’s im Griff! 

 

All Geschäft si zue!  Au s Puff!  No lang. 

“Das goht nid! I ha jetz dr Drang. 

Nach Gsetz bini, das gseh doch all, 

E klare Härtefall!”                                WOAU! 

 

Refr.:   Wart bis dr Berset chunnt! So chunnt d Wirtschaft uf e Hund! 

             Es isch am Sinke, s lecke Schiff!  Alain, du hesch’s im Griff! 

HEY!
 

Melodie: "The Wellerman" - Shanty